自己套系統一路都無乜落任何補品，只有一隻Lightspeed HT1 MKII，啲電源線都只係黑雞，訊號線都只係Gotham 11301，因為希望留力升級硬件。唯獨有一個配件一定要加，就係地盒，而且係越大越好，當年喺Kenneth兄幫手下造咗一隻100磅重嘅地盒，效果真係好驚人，自此就認定地盒係系統內不可缺少嘅一員。
可惜，一樣咁重要嘅器材竟然無拎過嚟英國，重要直接掉咗，真係好白痴。就算想造過一隻但喺英國好難買到黑氣石，有都好貴，買35kg黑氣石貴過買隻Tripoint 地盒，買全新又貴得滯，唯有上網睇下二手地盒，地盒基本上唔會壞，只係怕地盒嘅金屬生銹影響導電能力令地盒效能減弱。
最後喺eBay見到隻二手Entreq Silver Tellus地盒同Eartha challenger XLR地線，就膽粗粗入手，星期日order星期二兩件貨都到齊。
打開個紙盒見到全木盒包裝，上面大大刻住Made in Sweden就知起碼有二百磅去咗個包裝度，呢個亦係當年DIY地盒嘅原因，不過依家講乜都無用，鬼叫自己苯實咩。
好快咁拆盒放上機架，駁線就係咁簡單，暫時只係駁住部AV Processor，基本上無乜嘢都唔會再陏佢。
畫面上暫時差別唔太大，聽歌就明顯少少，啲嘢整齊咗啲，咁就當好咗架喇！
PS: 以上係自我感覺良好嘅飛機文!
