Cary Audio Cinema 11a 升級至HDMI 1.4 ver

啱啱將部Cary 11a upgrade咗去HDMI1.4，
暫時不停咁煲緊，聲嘅表現同1.3差唔多，
lock HDMI 嘅signal唔見快咗，
但lock signal時就比之前少咗好多雜聲。
而畫面就好燥，好多noise，
希望煲下會好啲。

但最麻煩係Upgrade完，部Oppo同Cary嘅HDMI handstake出現問題，
喺熄咗display(TV/display)情況下，
用Analog input的聲會斷斷續續，
而用HDMI input就會No Signal，
即係一係開display聽歌，
一係癈咗Oppo嘅CD功能，
之前用HDMI 1.3無問題。

[2011.5.20] 家訪KITCHAN兄的細緻大畫面

好多朋友都話玩影音嘅保值情度不及兩聲道好，因為影音制式經常改變，睇睇由HDMI制式開始短短幾年轉咗幾多代。對好似Anthony呢類嘅一般打工仔係講一萬幾千已經係一個幾大嘅投資，辛辛苦苦儲錢買嚟嘅旗艦型號到聽日分分鐘送畀人都嫌阻地方，真係好無陰公。所以要玩得聰明就要識揀一啲高價性比嘅產品。就好似今次嘅家訪主角KITCHAN兄，佢所選用嘅都好多都係出名極高價性比嘅產品。

今次Anthony受網友KITCHAN兄嘅邀請為佢為HC4000做調校，同好多朋友一樣KITCHAN兄都係將影音放置喺大廳，整個廳嘅面積大約為180呎左右成橫向長方形，左邊為飯廳，右邊方置影音置設。

皇帝位離80吋投影幕大約12呎，左右前置距離約5-6呎，而超低音放置右面。用作5.1聲道嘅後置喇叭放置係後牆高於耳仔水平約兩呎微微指向皇帝位。KITCHAN比較著重視覺平衡，所以中置以至左右聲道喇叭再到器材架都係儘量放得平衡。

器材上KITCHAN兄所用係5.1聲道系統，一對前置用上純厚見稱嚟自英國嘅QUAD 22L2座地喇叭。

中置方面亦用上中低密度出色嘅Dynaudio 122C。

而AV擴音機，自KITCHAN兄從購入後級擴音機後，一直都希望可以用上純AV前級以代替本來嘅Pioneer LX82，最後看上超高價性比嘅Onkyo PR-SC886。KITCHAN兄表示雖而Pioneer嘅AV擴音機係以分晰力見稱，但自從用上前後級後，不論分晰力，力度至控制力均比本來嘅Pioneer LX82好得多。

令KITCHAN兄一心昇級至前後級玩法就係呢部來自美國高價性比嘅Emotiva XPA-5，呢部後級擴音機每聲道可以輸出200W嘅推力，就算係用嚟推對QUAD係座地喇叭同大食中置一樣應付自如。

後置喇叭KITCHAN亦同上B&W DS3兩極後置喇叭，呢對後置喇叭可謂係二手巿場中嘅搶手貨，好多時都係見光死，一放即售出。實力無可置疑。

超低音可謂係系統中嘅靈魂KITCHAN當然講究啦，所以由之前Sunfire同MK KX12 嘅超低音組合改為MK MX250。KITCHAN兄表示用上兩隻唔同品牌唔同特性嘅超低音要花上好多時間去調校，但一直未夠得到滿意嘅效果。所以最後換成一隻較高階嘅MK MX250，MK MX250出名又揪得收放又快速，呢個選擇絶對係正確。

投影機就係近期大熱，個個讚好嘅三菱 HC4000 ，唔好睇小呢部入門級嘅DLP投影機，不論色彩，對比至可調教項目均萬分出色，而KITCHAN兄亦正路地配上80吋OS PrueMatt2幕。

Blu-ray Player就亦係價性比十足嘅Philips嘅9500，呢部Blu-ray Player用料十足，加上Philips呢個品牌係DVD年代已經係被公認為十分出色嘅播放機，相信嚟到Blu-ray年代亦難唔到Philips。

另外CD player多媒體播放機同遊戲機當然唔少得，KITCHAN兄同時擁有Cambridge Audio CD Player，名噪一時嘅HiMedia HD100同Blu-ray Player始祖PS3，可謂器材多多件件出名。

多得HC4000嘅線性表現同多項專業嘅調校項目，當晚畫面調校工作十分順利，一般調校過程喺以前嘅家訪報告都分享過所以不作多著墨。而當晚喺KITCHAN兄嘅要求下Anthony亦帶備外置Sound Card同音壓計玩一下RoomEQ，而攪完一大論之後各人均認同，喺一般家庭環境中好難做到由低音至高音中嘅所有頻段均保持平直，當遇上頻段峰值時還可以用EQ減掉，但當遇上谷值時就不能單單靠EQ挽回平直。空間處理，各聲道擺位都十分重要。KITCHAN兄明白要利用呢個RoomEQ呢個音場量度軟件去幫助改善音場要用上好多時間，所以今次只係希望清楚軟件嘅一般操作。

當調校完畫面後，KITCHAN兄就拎隻Avatar出嚟試下聲畫，當晚除咗Anthony外重有早前被家訪過嘅Steven兄。在場各人均覺得由BDP9500配以HC4000同OS出嚟嘅畫面十分出色，不論色彩同立體感都好好。

之後再試下King Kong，Anthony本身都好鍾意呢隻碟因為不論聲畫同劇情都十分出色。試咗一陣Anthony覺得就HC4000真係好靚，King Kong嘅毛色層次分明，而畫面上嘅細節都睇得好清楚。

最後再試咗Ninjar同2009年維也納演唱會，HC4000嘅畫面真係深深吸引住Anthony，成個畫面好似化咗妝咁滑不留手、黑位結實有力、 金屬度亦十分特出，真係一試難忘。

而聲音方面由Onkyo SC886配以Emotiva XPA5出嚟嘅水力當然唔成問題，而中置聲同後置聲十分特出，KITCHAN兄表示反覆測試後，佢將中置加大1.5dB而後置加大1dB。

KITCHAN兄受佢嘅師父影響，認為將前中置嘅分頻點設為FULL BAND可以低頻更加飽滿，而Steven除同意呢個講法外亦覺得將前置設為FULL BAND後可以得到更多嘅低頻層次。的確當晚嘅低頻感覺豐滿令人聽得幾舒服。

另外因為本身B&W嘅DS3後置喇叭雖然本身三個方向都有單元，但真正運作時揀mono只會由中間兩個單元出聲，而揀Bipolar時則由兩聲單元出聲，所以一般情況下係唔係三個方向同時出聲。KITCHAN兄表示幸好早前依照網友分享更改內部接線嘅方法令到DS3可以做到三方向同時輸出聲音，現時令後置聲音更有包圍感。不過凡事都有代價，KITCHAN兄同Steven兄都感到DS3出嚟嘅聲音比較分散密度稍欠。

而超低音方面KITCHAN兄亦對MK MX250嘅表現不太滿意，KITCHAN兄嫌隻MX250打心口感覺未夠。係無得改擺位嘅情況下，KITCHAN兄試過不同相位同距離或用Backfire將單元向牆，不過都未可做到打心口效果。的確Anthony覺得有某啲低頻係比較弱了一點，另外Steven亦表示佢感到皇帝位左邊嘅低頻實淨度同衝擊力都比皇帝位好。可惜同Anthony一樣，KITCHAN兄擺放超低音嘅位置全屋只得一個無得改，所以只可以將來睇下可唔可以喺其他地方改善。

好快兩個多鐘嘅家訪又到結束時間，真係要多謝KITCHAN兄嘅邀請令Anthony可以睇到咁高價性比嘅組合，同時亦多謝Steven兄係攝影技巧上提供咗好有用嘅意見。

-全文完-

以上為Anthony非專業個人感受，如資料上有任何錯漏歡迎指正。

[2011.5.13] 家訪CrazyBull兄的影音組合

早前收到CrazyBull兄的家訪邀請希望Anthony可以分享一下調校畫面嘅方法。閒談間得知外表後生嘅CrazyBull兄已經有個囝囝，Anthony問CrazyBull兄怕唔怕會打擾小朋友休息。CrazyBull兄表示平時小朋友喺屋企都都會照開機睇戲，如果十分想炸機時才會請太太同工人帶小朋友迴避一下。有好多網友都因為家中多咗小生命而須要放棄影音，而CrazyBull兄得到家人咁持支真係難得，CrazyBull兄更表示年紀小小嘅囝囝已經懂得自行開啓家中系統睇戲。能夠一家大細一同享受影音樂趣真係幸福得很。

CrazyBull兄嘅系統喺短短一年間可謂大更新，先係喇叭由Wharfedale 嘅Diamond同WH系列換上全套快狠準見稱嘅MKSound嘅MK750系列作7聲道，前中置係多人朋友都選用嘅LCR750，唔好睇呢隻喇叭細細隻，其實係好爆得加上又快又狠，一般二三百呎嘅環境都應付自如。

後置喇叭用上兩對ST55嘅兩極三向環繞聲喇叭，呢種設計嘅喇叭係可以做到聲音延遲嘅效果令環繞聲嘅連貫性。

而最近入手AV Receiver Marantz嘅SR7005代替Denon嘅AVC-3808外，同時Pioneer 嘅Blu-ray Player BDP320亦被新寵Marantz UD5005 Blu-ray Player所取代。

呢部MIJ嘅Maranrz AV Receiver SR7005早前已經聽過好幾次，感覺上除保留Marantz一貫嘅音樂感外亦加添一點點Denon嘅狠勁，加上分晰力亦十分出色，以價論貨真係十分抵玩。

Anthony早前亦試過部Blu-ray Player Marantz 嘅UD5005，又係價性比十足嘅產品，Blu-ray，DVD Audio同SACD樣樣得。加上Marantz嘅調音真係驚喜十足。

電視方面CrazyBull兄用上Sharp 嘅46吋iDTV，雖然Sharp並無其他品牌咁多新功能新技術，但Sharp呢個品牌係LCD顯示屏嘅龍頭大阿哥，加上由日本制造嘅屏幕，絶對係穩陣之選。

超低音放面就用上JL Audio嘅F110，相信好多朋友都知JL嘅超低音有幾堅，上次Anthony家訪Tangcoma兄時真係被佢兩隻F113打到內傷，雖然CrazyBull兄用上一隻嘅F110，但相信喺CrazyBull兄嘅影音環境已經好足夠。

除Marantz UD5005外CrazyBull兄重有一部Marantz嘅CD Player CD7003，CrazyBull兄都算得上係Marantz Fans。

CrazyBull兄嘅客廳為L字型，長長嘅一方用作門口同影音部份，Sofa後面為入口通道，所以可以皇帝位後面仍有足夠空間畀後中置，而皇帝位距離屏幕約8呎左右，而離後牆大約五至六呎左右，L型嘅另一邊四四方方嘅為飯廳。總括嚟講CrazyBull兄嘅影音空間算得上幾好。

有別於過往嘅家訪，今次係以分享調校畫心得為主，所以由驗查各器材設定開始至各校機碟嘅選擇、屏幕各項調校選項嘅用途、理論再到著手調校都遂一同CrazyBull分享，而CrazyBull兄亦好認真地用筆記下有關要點。

 

當然短短個多兩個鐘要由全無畫面調校概念到真正理解(Anthony都未可稱得上百份百理解得嗮)係無可能，亦見到CrazyBull兄因Anthony好多時詞不達意而攪到一頭煙。Anthony就向CrazyBull推介DVE HD呢隻校機碟，DVE呢隻碟入面對畫面同聲音調校嘅理論都有好好嘅介紹，而碟中亦有唔少供聲畫調校嘅素材，唯一缺點係不設字幕。

當分享同調校完部電視後，CrazyBull兄就拎隻How to Train Your Dragon卡通試試畫質。CrazyBull表示之前睇畫面時總覺得人物膚色太過紅潤，而調校後人物膚色自然好多加上衣服嘅紋理亦比調校前清楚，不過顏色就較之前稍為淡。Anthony解釋覺得調校完淡咗係因為之前飽和度大高，睇落好似色彩豐富咗，但其實色彩過濃會影響層次令畫面細節流失。

見重有少少時間，CrazyBull兄就希望Anthony可以分享埋聲放面嘅調校。CrazyBull兄表示自從由Denon轉到Marantz後總覺得欠少少刺激，而高音略為不足。Anthony就著CrazyBull兄進入SR7005嘅設定睇睇，見到經自動設定後SR7005將一對前置嘅分頻點設為90hz而後置為80hz，Anthony先將前中置設為80hz後置設為100hz。再驗測一下SR7005喺自動設定後用EQ將一對前置嘅高音減少，Anthony就建議CrazyBull兄將EQ關掉再聽一段時間，如果重係覺得高音唔夠可以喺EQ或線材上著手。

 

由於當晚家訪小朋友中途睡醒吃飯，Anthony確實唔好意思叫CrazyBull兄開大音量好等Anthony試試聲，所以唯有喺調校上畀少少意見等CrazyBull兄可以喺閒時再依自己口味調校一下系統。

最後要多謝CrazyBull兄嘅邀請，能夠同一位玩得咁認真嘅網友交流經驗真係好開心，希望不久嘅將來可以再同CrazyBull兄吹吹影音經。

-全文完-

PS:以上為Anthony非專業的個人感受，如資料上有錯漏歡迎指正。