如果間房係用來聽電影 / 音樂 / Hi-Fi，而又用咗大量吸音材、bass-trap，最後發現聲場「太收 / 太死 / 太沉」，其實問題唔係器材，而係房間本身反射、擴散同低頻處理唔平衡。
適量加入 diffuser、重新規劃 mid-bass / low-freq control，再加上吸音同散射之間嘅平衡，往往先係最關鍵嘅一步。
趁太太返咗香港追星，屋企無其他人阻住，我就索性一次過對影音房做咗一輪較完整嘅聲學改造。目的好簡單：
由之前偏向「吸音 + bass trap + dead sound」，調整成「低頻更穩、中高頻開揚、空間感回來、音場闊度增加、整體更自然」。
以下記錄下我嘅做法、邏輯同實際聽感。
改造前後設定
原本（Before）
- 天花前中置第一反射點：一塊 GIK Acoustics 244 橫向吊住。
- 前置 / 中置側牆第一反射點：同樣係 GIK 244，屬吸音主導，較大程度吸走咗中高頻能量。
- 後牆 + 角落 + surround-height：GIK T40 配 DIY Rockwool，低頻控制為主，但整體仍然偏死、偏吸音。
整體風格屬於「absorptive + bass-trap dominant」——
好處係乾淨、集中、定位清晰；
但代價係中高頻反射不足、空間感欠奉、音場唔夠闊、延展感唔足。
現在（After 改造）
- 天花前中置 244 保留，不過
→ 喺其後方再加一塊 600×1200 mm t.akustik Manhattan Diffuser，
令原本單純吸音嘅天花變成「吸 + 擴散」組合，聲音即刻冇咁死實。 - 前側牆第一反射點（原本 244）
→ 換成 GIK Amplitude™ Bass Trap Panels
廣域吸音之餘，中高頻唔會畀吸盡，聲音多咗自然反射同密度。 - 後側牆 surround-height（原本 T40 + DIY Rockwool）
→ 同樣換成 Amplitude™ Panels
加強後半場嘅擴散與能量分佈，後置、rear height 聲音唔再一條直出咁硬。 - 後牆、後天花、聆聽位左右牆：
統一加上 Manhattan Diffuser，為中高頻提供散射和空氣感。 - 所有前天花與兩側嘅 Manhattan Diffuser 都噴成黑色，
一來望落唔會似發泡膠，二來夜晚睇投影唔會反光。
總結：
房間由原本的「吸音 + bass trap + dead room」
轉向「bass trap + 吸音 + 適量擴散／散射 + reflection balance」嘅混合式聲學結構。
改造後聽感／效果
安裝完之後即刻執番喇叭擺位，再校返音壓，之後用幾段熟悉 demo 試咗一輪——
改善幅度比預期大。
- 聲場闊咗，尤其左右延伸好明顯，整體空間感大咗一個碼咁。
- 包圍感提升，surround 聲唔再係一條線咁直射，而係散得更開、更自然，層次分明。
- 中高頻細節回來咗，人聲、空氣感、殘響都更加立體，冇咗之前個種焗促嘅感覺。
- 低頻 tighter、爽快咗，量感依然足，但乾淨好多，反應比以前快。
- 整體由「死板 / flat」變成「鬆容、自然、有空間感、有深度」。
就我而家套器材再加上空間限制，呢次聲學改造嘅提升係相當實在，值得。
總結
今次嘅調聲過程，基本上係由多次試驗、改位置、改材質、試反射點、試中高頻散射，再到處理 low-freq、mid-bass 等多方面結果累積而成。
對我嚟講，聲音由「細、收、乾」變成「闊、空、有層次」，改善係清晰而且具說服力。
當然間柴房始終窄長，要做到舊居十幾呎闊嘅 soundstage 本身就係自欺欺人。但有限空間做到最盡、盡可能挖出聲音嘅潛力，正正就係香港發燒友嘅日常。
今次改動更加深刻體會到，聲學處理對細空間帶嚟嘅改變可以幾誇張。
只要方式用得啱、方向明確，成個房間嘅性格真係會完全唔同。環境許可嘅話，非常值得做。
以上為自我感覺良好嘅飛機文！
沒有留言:
發佈留言