[2011.4.29] 分頻點的少少分享

好多時見到有網友問及到底分頻點應該校幾多先啱，今日同大家分享一下Anthony對AV AMP入嘅分頻點校嘅個人睇法。其實要知道分頻點應該校幾多先啱，有幾點我哋應該先了解:-

1)      作用

2)      器材效能

3)      個人口味

作用

先了解分頻點嘅功能係將7/5聲道中某特定頻段以下嘅聲音交由超低音處理，以減輕7/5聲道喇叭應付低音嘅壓力。對要求效能嘅低音或超低音頻段嚟講一般主動式嘅超低音喇叭係一個好好嘅幫手。當然超低音喇叭亦須要處理嘅低音音軌啦，所以一隻高效能嘅超低音喇叭可以有助整個系統嘅提昇。

而7/5.1中嘅.1名為LFE(低音效果聲道)，當中只包含120hz以下嘅聲音。而佢嘅分頻點一般會名為LPF of LFE(視符廠商)，一般可調嘅頻段嘅係由80-120hz。同主聲道分頻點相反，LPF of LFE係將某特定頻段以上嘅聲音過濾或交由主聲道處理(視符廠商設定)。

而調校分頻點嘅最終目的係希望主聲道7/5隻喇叭可以同超低音喇叭接軌，從而令各喇叭可以暢順地從播整個頻段唔會出玩段層。

器材效能

了解分頻點作用後就要了解器材，一般要考慮嘅有:-

1)      所聲道喇叭嘅有效頻段(frequency range)

2)      AV AMP/Power Amp嘅推力

3)      超低音喇叭嘅效能

每一隻喇叭都會有自己嘅有效頻段，例如Elac FS247嘅有效頻段係30hz-50khz，換句話說呢對喇叭係可以重播30hz-50khz頻段內嘅聲音，但要留意嘅係以上兩組數字係對喇叭嘅極限，雖然係可以出到呢個頻段，但一般喇叭去到最盡嘅頻段都會出現失真同衰減，越接近兩極數字，越覺失真同衰減。所以一般情況下唔會就咁跟喇叭嘅有效頻段咁校。以Anthony對FS247為例，就算佢係去到30hz咁低嘅頻段，但都唔會將前置嘅分頻點設為30hz，只係設到較高嘅頻段。

AV AMP/Power Amp嘅推力亦係考慮因素之一，因為一般合併式嘅AV AMP推力有限，對應付座地喇叭以輸出低頻會較吃力，所以一般會以80hz為中間點，用80hz係因為100hz以上嘅聲音開始出現方向性，如果將分頻點定得太高有機會出現超低音喇叭現形問題。如果有power amp幫助的話，可以嘗試設到較低嘅頻段，但因為上述所講嘅失真同衰減問題，即使有好大力嘅Power Amp一般都唔會用盡喇叭有效頻段。

超低音喇叭效能亦須要考慮，但較為次要。主要係考慮當AV AMP/Power Amp同7/5聲道喇叭可以應該到較低嘅頻段時，相反地可以減輕超低音喇叭嘅工作壓力，令佢可以專心處理.1聲道。

個人口味

以上嘅都係較客觀嘅因素，用家嘅口味先係主要。一樣嘅器材配搭唔同嘅分頻點會有唔同效果。THX標準建議將所有聲道嘅分頻點設為80hz，但要留意THX標準對器材同環境都有一定嘅要求，而THX標準嘅7/5聲道喇叭一般為書架式，假如用家所用嘅左右主聲道為座地喇叭加上足夠推力嘅AV Amp/Power Amp，係可以將分頻點設得低一點從而得到更好效果。相反如果所用嘅係小形衛星喇叭，可能需要將分頻點定得比80hz更高。

只要用家多試多聽，唔好單看數字，Anthony相信每人都可以揾到自己嘅聲之道。

-全文完-

PS: 以上為Anthony個人嘅非專業分享，如有錯漏歡迎各界好友指正。