好耐無同太太(Vicky)兩個人去旅行，對上一次已經係去希臘Honey Moon，計一計已經係都有五年嘞。婚後去親旅行都係同家人一齊去，無得二人世界。而呢兩年又因為轉工而損失咗好多假期，無假就想去遠啲都唔得。左揀右揀，最後揀咗北京四天團。由四月二號出發玩到五號，第一天嘅集合時間係0630地點當然係機場啦。
嘩咁大個仔第一次要咁早去機場，當晚凌晨四點半要起身梳洗，五點零出門口搭最早嘅機場巴士。真係攰得要緊。好在喺巴士到上到飛機都瞓到死豬咁。
大約早上十一點零鐘到達北京，步入北京機場第一嘅感覺係好大，由落機到入境櫃位真係行都行到腳軟。地方大之外重好乾淨同先進。港澳人士持回鄉証入境只要行一個類似e通道嘅閘口就可以，聽見有同機朋友抱怒比香港e通道慢。其實係因為北京呢個入境系統除咗讀取你喺回鄉証內嘅資料以核對你嘅指紋外，重會用鏡頭識別你嘅容貎。但如果好似Anthony咁發褔得緊要得滯，同証件相中容貎相差太遠，就會花好多時間。
步出機場同一眾團友集合後，一行廿多人正式開始北京嘅第一天行程。第一個景點係食午飯，哈哈! 而第一天嘅團餐係北京十分出名嘅烤鴨。當日食嘅烤鴨算得上十分肥味，味道方面團友話比香港差，而其他菜色就不過不失。Anthony就食多幾件先算，哈哈。
食完午飯後就坐車去頤和園。頤和園是清代帝后的花園和行宮，地方大到一日行唔嗮，所以今次行程主要只係沿住頤和園長廊由頭行到尾，當然中途有好多大大小小嘅建築物可以影下相，亦有唔少商鋪售賣小食飲料同紀念品等。
之後傍晚就到咗北京嘅d東門大街步行街，據講呢條街係因為奧運而建造，入面有好多名牌商店同食肆，入夜後嘅燈色好靚，見到有部類似單層電車停泊咗喺站內，相信已經收咗工無得搭，實在有點可惜。由於北京四月天氣由廿度到幾度，行咗一陣發覺越行越凍，唯有入去Starbuck飲杯熱咖啡暖下身等食晚餐。晚係地道宮廷式北京菜，有幾地道有幾宮廷? 總之就有魚有肉有湯有飯啦。
剛食完晚飯從側門行出餐廳，發覺原來外出有條售賣小食嘅小街，十分熱鬧。食品種類繁多，由燒粟米到燒蝎子都有，如果唔係剛剛食完晚飯，Vicky同Anthony一定由街頭掃到街尾，試均不同小食。
第一日行程好快就結束嘞，因為第一晚會住喺效區嘅温泉酒店，所以車程要成個半。雖然酒店有温泉，可惜嘅係到達酒店時已經係十點幾，加上Vicky有少少感冒，所以都係留喺房內休息。酒店房間好大好新淨，不過因住地下一層加上喺效區，窗外無乜景色可言。
第二天又係0630 morning call 0700食自助早餐。雖然只係一般西式早餐，不過Anthony就覺得好美味。享用完早餐得0800出發，開始第二天嘅行程。出發時先睇到原來我哋入住嘅酒店係一間好靚度假酒店，出面嘅風景好靚，可惜嘅係要出發第二天嘅行程，唔可以留底影下相。
由於第二天係星期日，加上係清明時節，北京導遊話由巿區出效區掃墓嘅人好多，而北京車輛數目驚人，所以如果當日由巿區去效區就一定有排塞，好在我哋係由效區入巿區。話時話，記憶中北京有好多好多單車，但今次只係見到汽車，見唔到單車喎。
第一站係玉石巿場，都係由商店代表介紹一下啲玉石首飾，Anthony就同Vicky影下相等時間到。
到附近食午飯後，之後到咗另一藥廠參觀購物得就到咗士多啤梨園摘士多啤梨，未到之前Anthony以為導遊會帶我哋到一大個好靚嘅草園去摘士多啤梨。但原來所謂嘅士多啤梨園只係一個有幾間唔知係殘舊不堪定係未興建好嘅小型温室。好多團友入到去都話熱到想暈，而Vicky起初都只係企喺門口唔入去，好彩經遊說下Vicky都入咗去畀Anthony影幾幅相，後來Vicky話原來嘅士多啤梨係好甜。
到附近食午飯後，之後到咗另一藥廠參觀購物得就到咗士多啤梨園摘士多啤梨，未到之前Anthony以為導遊會帶我哋到一大個好靚嘅草園去摘士多啤梨。但原來所謂嘅士多啤梨園只係一個有幾間唔知係殘舊不堪定係未興建好嘅小型温室。好多團友入到去都話熱到想暈，而Vicky起初都只係企喺門口唔入去，好彩經遊說下Vicky都入咗去畀Anthony影幾幅相，後來Vicky話原來嘅士多啤梨係好甜。
摘完士多啤梨就上長城做好漢，落車地點係稱謂”天下第一雄關”嘅嘉裕關，眼看長城嘅宏偉，二千幾年前嘅人力物力可以建築到咁巨大咁長嘅城牆，真係令Anthony汗顏。不過長城梯級都十分斗斜，以Anthony同Vicky嘅腳骨力都只係行咗幾個地方，影下相就算。
行下影下話咁快就個多兩個鐘，又到集合去下一個景點，天安門廣場。去到天安門廣場時已經係傍晚時份，撞啱好多遊人圍觀等睇降旗儀式，所以唔能夠好好咁影到天台門廣場嘅全景，唯有影下人民紀念碑同毛澤東紀念館外嘅錭像。但影咗一陣已經畀解放軍哥哥體貎地請我哋離開，原因係夠鐘關門，夜晚天安門廣場係唔開放畀遊人參觀。
第二天嘅晚飯係食火煱，有牛有羊有豬有雞有菜有餃子，十分多選擇，味道都唔錯架。
最後又係返酒店嘅時間嘞，第二晚牫哋住近北京巿中心，酒店比第一晚嘅細同舊，但明顯高級過第一晚間温泉酒店。因為第三天又係0630 morning call加上第三天行程係行故宮，都係早啲休息抖足精神好啲。
第三天亦西式自助早餐，比第二天嘅選擇差唔多，但味道較啱Anthony口味。食完早餐就開始第三天嘅行程，第一個地點係國家級嘅中醫研究院“寶藥堂”。呀! 係 “同仁堂”先啱，同仁堂係一間有二百幾歷史嘅藥行，多年嚟幫歷代皇帝至現時嘅國家元首保健，可謂地位超凡。當日除咗有院長級嘅教授講解中藥嘅原理同威水史外，亦請嚟多位國家級嘅保藥黨，Sorry係國家級嘅中醫教授幫各團友打打脈，講下各位嘅身體毛病。最後各位當然係乖乖畀錢買保品啦，錢事少，身體健康無價嘛。買完保品就去午飯。
去完同仁堂先行故宮一定無咁辛苦，事關人(荷包)輕咗，行故宮自然輕鬆好多(笑)。但到故宮前先去景山公園，睇睇崇禎皇帝上吊嘅地方，當然今日已經變成北京居民一家大細休憩消閒嘅好地方。而行上山頂後可以一覽故宮全貎，真係十分壯觀。
之後上車去到故宮，故宮又名紫禁城，面積有成720,000平方米 ，而房間樓目達九千九百九十九間，當一日行到一百間房，都要行足三個月先可以行得嗮，真係誇張得很。
導遊帶我哋到午門入故宮，成日睇電視劇話“推出午門斬首”就係呢度門。導遊話當然無人喺午門門口被斬首啦，斬首地點係午門對出好遠嘅地方，“推出午門斬首”只係指由午門推出去咁點啫。
故宮咁大，當然唔唔會由我哋自己行啦，導遊就安排我哋睇一啲收藏品，好似鐘表館咁，慈禧太后嘅十六片鑽石等，有啲要畀錢先可以入場。但對Anthony同Vicky嚟講，情願畀多啲時間我哋出去影下建築物同石獅子好過。
行完故宮後，導遊安排一眾團友在三輪車遊胡同。袒白講，當日胡同內好多屋都正在重建或者已經凋空破爛，加上沙塵滾滾，根本無乜好遊，反而難為一眾三輪車車伕要載住我哋十幾廿分鐘。
遊完胡同又要趕去下一個景點鳥巢同水立方，記得08年奧運Vicky同Anthony喺屋企透過電視睇開幕式，見到鳥巢嘅奇怪建築同會著燈嘅水立方時都覺得好新奇，當時已經好希望可以親眼一睹呢兩個偉大嘅建築物。
當到達鳥巢同水立方時已近黃昏，而因為要趕水立方關門前入到參觀，所以導遊只畀二十分鐘時間我哋到鳥巢外影相，唔好以為二十分鐘好多，因為由水立方到鳥巢都有一段路程，來回都要十多分鐘，所以真係趕到死死下。
由鳥巢返回水立方一段路中，Anthony驚見兩位美國好出名嘅卡通人物同遊人影相，大家可以從相中自行判段一下兩位卡通人物嘅真偽。係官方奧運場地外出現呢兩位卡通人物，內地政府對知識產權嘅保護會可見一班。
之後導遊安排我哋入去水立方參觀，但去到閘口又入唔到，成班人企喺水立方門口等，後來導遊不停咁同團友講，水立方每一日嘅門票有限，佢幫我地買嘅都係黃牛飛，重覆講好幾次。Vicky同Anthony都有疑問，點解唔一早買定門票，係唔係一定要即時買呢?
水立方入面其實無乜嘢睇，除奧運比賽場地外，只係有個設有人造浪嘅公眾室內泳室同一啲售賣紀念品嘅攤位。
離開水立方時已經係日落，又到晚餐時間，喺北京嘅最後的晚餐係餃子宴，成十種不同餡料嘅餃子，真係食都膩膩地，好在餐前導遊叮囑各位唔好食得太飽，因為晚飯後會帶團友到王府井大街去掃街食小食。
王府井大街同出面條小食街都有好多古怪嘅食物出售，海馬、蝎子到蜈蚣都有，Vicky同Anthony都唔敢試，只係買咗串沙糖生果同燒雞翼一試，不過味道大濃唔係太啱口味。
四月五日
第三天行程就咁結束，而第四天行程亦只係到另一國家級嘅保建地方做足底按摩，之後安排團友到秀水街自行購物同食午飯，原來所謂嘅秀水街係一座設有food court同專門賣冒牌衣物嘅商場。Vicky同Anthony就對購物無乜興趣，一早揾定間餐廳食飯。
喺北京嘅最後一餐點咗五香牛肉麵、三色冷麵、蟹黃飽同豆沙春巻，每一款都十分美味，可惜，又係掛住食唔記得影相。
食完午飯就要去機場返香港，四天行程十分緊密，但都有好多地方去唔到，如天壇、十三凌同四合園等等都未能參觀。
今次北京嘅最大體驗係原來中國有某些地方人民嘅文化質素已經同世界接軌，喺北京所見嘅街道大部份比香港乾淨，亦唔見有巿民踎喺商店門口。Anthony認為一個真正富強嘅國家係除咗人民有財富外，佢地嘅文化水平可唔可以同世界接軌都緊要。而國家嘅係先輸出產品，再輸出自己嘅文化，呢點就係國之路。相信呢個係好多中國人嘅目標。
-全文完-
沒有留言:
發佈留言