今次Anthony受老友亞Jay嘅邀請上門為Joe兄作聲畫調校。Joe兄所住嘅係屬於發展商購入丁權後所建嘅村屋，雖然都係有約有700呎嘅面積，但間隔同一般眼鏡屋村屋唔同，加上本身村屋間隔實用，所以地方十分見駛。
而Joe兄嘅影音系統就係放置係大廳，地方成打撗嘅長方形，右面係露台，左面係飯廳同厨房。視聽環境算係寬敞屏幕到皇帝位有十多二十呎，左右喇叭又夠闊，絶對係理想嘅空間。
Joe兄主力係玩兩聲道而影音為次，兩聲道上Joe兄認識唔少DIY老手，所以部份器材係DIY版本，各位唔好以為DIY就係Cheap嘢，呢班DIY大師縱橫兩聲道多年，玩過唔少貴價機，出自佢地手嘅DIY器材好多都係由名牌機中抽出入面嘅貴價零件再組合埋一齊最後加以調音而成，所以絶對都唔cheap，
Joe兄嘅顯示屏用上Panasonic 新款P65VT20H嘅65吋3D大電視，係呀，無睇錯呀。係65吋重要有3D添呀，可以喺家中有咁大嘅3D電視，真係超視覺享受。
而Blu-ray Player就用上同品牌嘅BDT300，貪佢同部3D電視同一品牌外，重有嘅係BDT300係第一部3D Blu-ray Player置有兩個HDMI輸出，可以同時分別接駁兩條HDMI線，一條入3D TV另一條入AV擴音機。咁就算部AV擴音機唔對應3D訊號一樣可以由BDT300直接畀訊號至P65VT20H直接輸出3D畫面。
AV方面Joe兄用上Onkyo PR-SC886純前級擴音機，Anthony都同期Onkyo嘅合併NR906，對Onkyo嘅高價性比十分難忘，加上調校簡易同睇戲聽演唱會都有唔錯嘅表現，真係可謂大件夾抵食。
Joe兄對兩聲道方面比較著重而亦明白訊源嘅重要性，所以DAC一啲都唔馬虎用上dCS 嘅Elgar/Purcell，呢锢dCS唔係直銷中心，而係嚟自英國嘅DAC制造商。
兩聲音前級就用上DIY嘅Tube Pre AMP。
後級方面就真係夠Watt，Joe兄用上三部後級去推5個聲道，第一部都係DIY嘅 Solid State Power AMP 用嚟推對Wilson Audio。
而大大件Class A嘅Krell KSA80B就推Elac隻中置，唔好睇佢得80Watt，Class A嘅80 Watt唔同Class AB嘅80 Watt架。
而另一部Krell KAV250A 就用嚟推一對Elac 後置，250Watt推對後置你都唔好話唔奢侈。
主聲道就利害，Joe兄用上人稱Watt5嘅Wilson Audio Watt/Puppy 5i，Anthony之前聽過一對Watt3十分揪得，相信呢對Watt5一定更加堅。
中置Joe兄就用上Anthony一直都好想換嘅Elac CC241，當晚真係好想扑暈Joe兄搬隻CC241返屋企。
而後置方面重過份，Joe兄直情將別人用作前置書架喇叭嘅Elac BS244當後置喇叭用，唔怪得要用上250Watt嘅Krell KAV250A 去推啦。
超低音Joe兄就用上SVS新款嘅SB13+，呢隻SVS新款嘅箱型超低音無PB系列成張飯枱咁巨型，更適合一般家居擺放。
三部後級重要部部咁高Watt數再加埋對Watt 5前置，相信各位都同意Joe兄嘅系統真係幾夠Watt。
今次家訪主要係幫Joe兄喺AV方面攪攪聲畫，用上AVS HD709校機碟為部Panasonic P65VT20H作基本調校後發覺用上THX模式(係呀部P65VT20H有THX模式架，係咪好正呢)中嘅預設數值已經十分接近標準，之後再用Spyder 3TV配以ColorHCFR量度灰階時亦發覺THX模式最接近D65，所以最後就用上呢THX模式。
校完畫面後Joe兄拎隻Iron Man 2試試賽車一段，由Plamsa電視出嚟嘅畫面十分討好，人物膚色自然、金屬感良好、而加上Plamsa先天嘅對比度優勢再由65吋震撼畫面輸出，比起用投影機睇一啲都唔會輸蝕，一樣睇得十分投入。
而聲方面，由Krell KSA80B推Elac CC241所出嚟嘅聲音出奇地帶有點點甜味，而多得鋁帶高音嘅特性令聲音十分開楊，人物對話亦十分清晰。不過Anthony同亞Jay都感到前置左右聲道音效偏細，後置聲音就較搶，而低頻音量亦較細。
Anthony就建議Joe兄先進入Onkyo PR-SC886嘅設定睇睇，見到Joe兄將一對前置嘅分頻點設為80hz，Anthony就表示以Joe兄對前置嘅級數加上部DIY後級嘅推力，可以試試將前置嘅分頻點略為設低一點，經Joe兄同意後Anthony就將前置分頻點由80hz改為60hz。
之後再進入音壓設定，發覺前置同中置輸出音壓分別十分大，而後置就比前置大聲。Anthony就取出音壓計為各聲道取得較近接嘅音壓。
之後再試試Iron Man 2，前置音效平衡得多，而整個音場亦同時加闊令氣勢更加好。不過發覺後置可能因距離同擺位而引致聲音仍然係比較搶，所以進一步收細後置音壓。另外亦將低頻遂步加大令震撼力表現更強。
之後再分別試咗Inception同David Foster Hitman演唱會，感覺上同一般以刺激同衝激力型嘅家庭影戲唔同，Joe兄嘅夠Watt組合係十分有戲院感覺，由空間感同氣氛都十分好，亞Jay表示直情感到啲聲效可以穿到後牆。
唯一就係中置喇叭嘅級數同對前罝有一段距離，顯得中置聲音有少少單簿，不過唔係太過明顯。其實Joe兄一直揾緊Wilson Audio嘅中置喇叭希望可以令前中置嘅聲音更一致可惜唔易揾。呢個時候亞Jay同Anthony都異口同聲話喺旺角二手鋪見過一隻好鬼大隻嘅Wilson Audio中置喇叭連腳架，Anthony重要推多一把話如果隻Wilson Audio中置連埋腳架放喺Joe兄個廳度型好多。Joe兄聽罷即表示會去間二手鋪度睇下。
最後要多謝Joe兄嘅熱情招待，而Anthony亦十分期待喺Joe兄度聽下Wilson Audio隻巨型中置嘅表現，更期待Joe兄將隻CC241以超超超抵價讓畀Anthony呢個成窮鬼以圓Elac前中置夢(笑)
-全文完-
PS: 以上為Anthony非專業個人感受，如資料上有任何錯漏歡迎指正，謝謝!
沒有留言:
發佈留言