影音組合好玩之處係藉著系統中不同組合可以配搭出千變萬化嘅聲畫效果，Anthony家訪嘅目的亦係希望可以透過家訪過程中去認識更多不同影音組合出嚟嘅化學作用，而且特別喜愛家訪一啲同Anthony用上同一款器材嘅網友，因為可以更體驗到自己家中某器材喺不同配搭上嘅表現。就好以早前喺康師父家中可以試一下用膽前石後推Elac FS247同ToFu兄嘅Marantz西裝配Elac FS247就已經好不一樣。而咁多器材中除Elac FS247外，Cary Audio Design Cinema 11a AV Processor亦係Anthony十分希望可以係別人屋企聽聽嘅器材，而今次家訪主角就係用上 Cary 11a嘅Canon.hk兄。
早前收到的士雄電話叫Anthony上去Canon.hk兄屋企玩下順便調校下部JVC HD350投影機，其實一直以來都好希望有機會可以家訪一下Canon.hk兄，原因係Canon.hk兄家中嘅器材都係Anthony一直好希望可以聽下，除Cary 11a外重有Anthem後級擴音機、Martin Logan超低音同最近新入嘅Marantz UD8004 Blu-ray Player加上Anthony家訪咁多次都未調校過JVC投影機。難得的士雄穿針引線Anthony當然一口答應啦。
家訪當日為星期六下午，因為Canon.hk兄已有一位四歲嘅小朋友，所以一般請朋友到訪炸機都會選擇下午時段。踏入Canon.hk兄嘅屋企第一個感覺得好整潔，整個客廳面積大約為百多二百呎從門口先進入飯廳然後係客廳，形狀為長方型四四正正。而影音器材當然係擺放喺客廳。
Canon.hk兄整個視聽環境大約80至100呎，皇帝位距離投影幕大約10呎，左右喇叭約6-7呎，超低音放置喺中置喇叭下面，Anthony覺得呢個擺法好好，比一般放置喺系統左或右邊更易達到超低音穩形嘅效果。而Canon.hk兄嘅皇帝位為貼後牆擺放，用上7.1聲道系統。
先介紹一下Canon.hk兄嘅器材組合先，AV Processor就如上述所講嘅Cary Audio Design Cinema 11a而且已經換上最新嘅HMDI 1.4底板，可以support到48 bit color，ARC，3D，4K2K等HDMI 1.4版本嘅功能。除此之外，代理亦將音量制換上更高級嘅零件，聲稱可以令聲音方面有進一步嘅提昇。
而後級方面Canon.hk兄同時用上兩部來自加拿大嘅Anthem後級擴音機，一部係用上大大隻環牛嘅MCA2，能提供每聲道200W推力嘅兩聲道後級，現時只負責推後置喇叭。
而Statement A5五聲道後級更用上兩隻大環牛可以輸出每聲225W，力水方面不用至疑，而Canon.hk兄有感現時正真有7.1聲道嘅Blu-ray不多，而佢亦不太喜歡將5.1聲道模擬上7.1聲道，反正後中置聲道不會經常用到。所以Canon.hk兄平時不會接駁一對後中置喇叭，可以減輕後級嘅負擔令Statement A5集中火力只應付前中罝。到遇上真正有7.1音效的Blu-ray時才將一對後中置接上，呢個玩法先係物盡其用玩得精明。
另一方面Canon.hk啱啱先昇級部Blu-ray Player，早前曾購入高價性比見稱的Oppo BDP93，可借覺得同家中系統不合拍，所以用上短短幾日就於二手巿場放售換上更高階嘅Marantz UD8004。呢部Marantz UD8004喺早前某討論區攪嘅Blu-ray Player比試會中得到不少網友嘅好評，而Canon.hk兄亦對呢部新款嘅表現十分滿意。
到七聲道喇叭，Canon.hk兄表示同好多新手一樣，第一次購買影音器才時都係以款式行先，所以喺未真正試聽過嘅情況下就購入全套七隻來自英國Mission Elegante系列嘅e83,e8c,e80喇叭。
而超低音Canon.hk兄亦換過好幾隻，而之前更試過同時用上MKSound MX250再加Rel Q200E行雙subwoofer系統。但Canon.hk兄一直鍾情的士雄家中早期嘅setting，覺得刺激得嚟又有Hifi味，所以最後亦用呢隻喺香港較少見嘅Martin Logan 嘅3*8吋超低音...堅。
投影機係JVC HD350配以OS SCREEN A1-080H BU202 80吋珠幕，JVC係Anthony唯一喜愛嘅非DLP投影機，佢嘅電影感同黑位都係十分出色。
雖然今次係第一次調校JVC嘅投影機，但多得部機嘅線性表現好快就調校好基本設定同灰階，不過Gamma值就為不論揀C或者係2.2都係維持喺1.8X呢個水平。辛好原來JVC可以自己設定Gamma值，最後喺”自定”中將Gamma值設為2.4，再用Colorimeter一度就得出2.2呢個平均值。
校完畫面後，另一網友Sing1357兄剛好到達，Canon.hk兄就拎咗Legends Of The Guardians: The Owls of Ga'Hoole，The incredible，The Rundown，The Bourne Ultimatum (2007)， War of the World同Resident Evil 4試下畫面。Canon.hk兄表示之前總係覺得黑色比較痴低，希望調校後會有所改善。由HD350配OS幕出嚟嘅畫面十分討好，而且有畫面真實得嚟又富電影感。而黑位比之前調校嘅三菱HC4000更見實淨。而Canon.hk兄用之前嘅設定A/B比較過得覺得畫面比較實在有質感，不過就較暗。Anthony表示如果覺得畫面太暗可以將光圏放至最大，或將Gamma值設至2.3或將Brightness加一至二格。
而聲放面Anthony就十分喜愛，感覺上同Anthony第一次家訪的士雄套系統有啲相似，都係中低頻十分特出而且異常實淨，但同時亦形做出唔錯嘅包圍感。由兩部Anthem後級所推動嘅喇叭有氣有力，迅變十足。難怪Canon.hk兄未有對早陣子到過佢家中作客嘅Lexicon LX7 七聲道後級動情啦。
Canon.hk兄向Anthony表示自從將Cary 11a換上HDMI1.4底板之後，中低頻收緊咗令人感覺低頻恆咗好多，加上啱啱換嘅Maratnz UD8004 Blu-ray Player做出好好嘅連貫感。不過Canon.hk兄覺得現時一套Mission喇叭為系統中嘅樽頸位希望可以換上Dynaudio有更好表現。
感覺上Canon.hk兄嘅系統同的士雄嘅早期setting有啲相似，Canon.hk表示現時嘅setting的確係追住當日的士雄嘅setting嚟做。其實家訪當日Anthony已經覺得Canon.hk兄嘅系統無乜值得挑剔嘅地方，印象最深嘅係The Bourne Ultimatum街頭追遂一段背景音樂形造出緊張嘅感覺，加上所有聲道同超低音涵接得十分好做到完全隠形嘅效果，亦無出現任何反效果。而一對放置左右兩側嘅後置喇叭就做到十分好的連貫性，總括嚟喎Canon.hk兄嘅系統已經係十分高質素。不過發燒友都係貪心的，永遠都希望家中系統能有更上一層樓嘅表現，Canon.hk兄嘅心情Anthony當然明白啦。
兩個鐘嘅家訪話咁快過，見Sing1357兄拎出幾條毒蛇上嚟畀Canon.hk兄以身試毒，為免毒及無辜都係早離開現場為妙。
最後要多謝Canon.hk兄嘅邀請好等Anthony能一嘗校調JVC投影機嘅心願，亦期待兄不久將來再次到訪Canon.hk更高質嘅系統。
-全文完-
以上為Anthony非專業的個人感受，如上述資料有任何錯漏歡迎指正。
沒有留言:
發佈留言