2011年6月16日星期四

[2011.6.3] 家訪Kelvin兄態度十足的影音系統


玩影音可以係一種生活享受亦可以係一種生活態度,而今次嘅家訪主角Kelvin兄絶對係後者。早前Anthony收到Kelvin兄嘅邀請希望Anthony可以作訪向佢套系統提供下意見。而到達Kelvin兄家第一個感覺係好舒適,睇到由裝潢到家居擺設都好幽雅,燈光十分柔和。


Kelvin兄的家居設計為橫向長方形,進入門口後左面為飯廳右邊為客廳,影音系統當然放置喺客廳一邊。Kelvin兄嘅視聽環境約一百呎,皇帝位距離屏幕大約十二呎,一對前置擺放離後牆約兩三呎多而前置距離皇帝位約七呎位置,左右置距離約八呎。皇帝位後有一個擺放軟件同裝飾嘅木架,一對後置放於木架頂上,而sub-woofer就位放喺左前置後。
器材方面,Kelvin兄所用嘅係5.1聲道系統,而電視機係Panasonic Plasma TV PY800,自從Pioneer徹出Plasma巿場Panasonic可以話係呢個巿場稱雄,素質上有一定呢保証。
AV AMPBlu-ray Player均選用上高分晰力嘅Pioneer LX71 AV AmpBDP-05 Blu-ray Player,相信呢部一代中階Blu-ray Player機皇都唔需要多介紹,除咗讀碟時間外其聲畫質素都得到各用家嘅高度評價,而配上同一品牌嘅Pioneer LX71 AV AMP一定係絶配。

後級擴音機就用上來自加拿大嘅Bryston 9BST,呢部擁有THX Ultra認証用上五隻獨立環牛嘅五聲道後級,每聲道均用上兩粒達15,000u嘅水塘,每聲道可以輸出120W(8 ohms)嘅推力,加上dumping factor高於500應付一般喇叭絶對唔成問題。Kelvin兄亦對電源質素十分講究用上Shunyata Hydra 8 + Anaconda電源處理器,Kelvin兄十分滿意呢個電源處理器嘅表現。

到喇叭嘞,注重聽歌表現嘅Kelvin兄用上ProAc D18座地喇叭,ProAc出名人聲甜美最啱聽啲小品音樂。

 中置喇叭Kelvin就選用外型同質素一樣十足嘅JMlab OC908


一對Spendor S3/5本來係用作前置,但自從ProAc入宮後,呢對Spendor就擔當後置喇叭嘅角色。


Sub-woofer就用上SVS PC-13 Ultra,呢隻巨物可以下潛到10hz,而見其體積已知可以輸出排山海嘅低頻。

雖然可以輸出驚人嘅低頻量,但如果低頻處理得唔好就好易攪到一屋blooming,所以要提一提嘅係呢舊Kelvin兄從海外訂購返嚟嘅Antimode 8033 Sub EQ Kelvin兄表示唔好睇呢舊Sub EQ的的式式,只要用個收音咪好簡單咁做一次setting,呢部Antimode 8033就可以根據唔同嘅聆聽環境去修正低頻嘅誤差。
電源處理器
家訪當日一踏入Kelvin兄嘅屋企已經聽到柔柔嘅Jazz音樂,而Kelvin兄問Anthony需要飲啲咩Anthony答隨便可以嘞,之後Kelvin兄就用部細細嘅咖啡機沖杯香濃嘅咖啡畀Anthony嘆下。


由於Kelvin兄邀請Anthony到訪志在交流,所以當日係唔駛作任何調校只要坐定定欣賞下軟件就可以。

Kelvin
兄現時多以Pioneer LX71network直接從PC讀取歌曲聽歌,Kelvin兄更表示CAS已經係大方向,而以由AV AMP直接由PC讀取歌曲嘅方法比經notebook或其他CAS玩法更直接音染更少,但Kelvin兄唔明白為何喺網上唔多見相關討,可能大家都會覺得由AV AMP做兩聲道解碼加放大未達真正兩聲道嘅水準。

Kelvin兄平時以聽歌為主加上自己有八級鋼琴操藝,所以論”Kelvin兄較注重嘅表現。Kelvin兄先用LX71播下幾首歌仔,Anthony第一個感覺係個音場好立體,空間感做得好好加上有一定嘅深度,呢種音場Anthony係第一次所聽到。Kelvin兄表示的確係前置擺位上下咗不少苦功。

而由Bryston 9BST推動嘅ProAc D18帶少少厚潤,下路豐滿而不肥,對聽開鋁帶高音嘅Anthony嚟講雖然高音未去得好盡但有更好嘅密度。
之後Kelvin兄選播陳潔儀新碟重譯中第一首<>,人聲嘅深度好好不過有少少偏左,Kelvin兄表示呢個係左右音場不平衡所致,說罷就隨即將一啲如膠箱嘅傢具放置右前置後方,感覺上左右平衡有所改善了。
Kelvin兄再分別用Blu-ray Player播放2009原音精選中<Smoke Gas In Your Eye>同用AV AMP直接讀取PC內嘅同一首曲目比較一下,Anthony感覺兩者於上路分別不大,但下路AV AMP比較清晰而Blu-ray Player就矇一點。雖然以Kelvin兄套系統用上述兩者聽歌方法喺質素上不算有太大分別,而後者的確會比較方便。不過用Kelvin兄用LX71直接讀取PC內嘅歌曲嘅缺點係唔能夠顯示中文字,所以有時都要對照手中CD嚟選曲。為此,Kelvin兄正在建立佢嘅CAS系統並已購入notebook,之後再加部DAC就可以用手上嘅iPac選曲。

最後都要試下睇戲嘅表現,揀咗The Dark KnightKu Fu Panda。雖然Kelvin兄用上SVS PC13-Ultra呢隻巨物,但其實睇戲時嘅低頻唔算大量。Kelvin兄解釋係佢故意將Sub-woofer音量收細,呢個setting係顧為整個家居環境同家中小孩而設,因為當低頻量太多時易有Bloomingsub-woofer音壓太大亦怕嚇親小朋友。再環顧一下Kelvin兄嘅家居原來擺放咗好幾支擴散柱去處理低音,的確SVSsub-woofer係量大而難玩,加上為顧及家中小孩低頻真係宜少不宜多。

 雖然低頻量不大,但亦做到SVS PC13 Ultra應有嘅震撼力,下溍力亦係十足。而無過量嘅低頻加上兩部Pioneer組合得出十分出色嘅分晰力,如The Dark Knight中銀一幕香港警察衝入大廈時背景中的對話清晰可聽,而Ku Fu Panda逃獄一段最後大豹跳上穚後尾巴同地面磨擦嘅聲音都輕易聽到,相對喺Anthony嘅系統上就要好留心先可以聽見。

總括上Kelvin兄嘅影音系統上Anthony會對嘅表現驚喜過,但其實當Anthony回想當晚家訪時嘅情況,想一下Kelvin兄整個視聽環境,包括柔和嘅燈光配以啡色為主嘅傢私同舒適嘅環境。喺呢個環境中享受下音樂嘆下香濃嘅咖啡,感覺上整件事係好配合,好一件時,呢個時候Anthony腦中出現陳豪品味咖啡呢六個字(),其實音色靚唔靚、高音通唔通透、中音密度好唔好、低音結唔結實呢啲一切都唔重要,呢享受已經唔單只係音樂,係享受人生。只可惜以Anthony低級攝影技術連家訪當日少少嘅氣氛都影唔到。Kelvin兄表示佢喺整個視聽環境嘅佈置花咗唔少心思,係希望可以將音樂、咖啡連同整體環境串連埋一齊變為一種生活態度。


今次真係要多謝Kelvin兄嘅邀請,令Anthony明白到我哋玩影音嘅基本目的係為享受,無需要盲目追求聲畫質素而自尋煩腦。



-全文完-

PS 以上為Anthony非專業的個人感受,如資料上有任何錯誤歡迎指正。

沒有留言:

發佈留言

澳門Benson兄的Optoma UHC68

(本文的所有相片由Benson兄提供,特此感謝!) 認識Benson兄是因為早年他購入JVC投影機後對影像調校有甚感興趣而在Whatsapp中和他交流了不少新資訊和知識。 當日是應Benson兄的邀請過江到澳門為他新購入的Optoma UHC68作出調校,今次是第二...