呢個星期好充實，一連做咗三晚家訪。繼鐵心心兄後前兩晚又去咗令一位網友度做家訪，未上去呢位網友已經提筆者要食定牛黃解毒片，因為佢屋企太毒嘞，呢位網友玩影音嘅資歷比筆者深(其實好多人都比筆者深，筆者只係接觸咗影音兩年多嘅時間)，呢位網友叫Kenny兄。
不過要拜訪呢位高手少嘅訪誠意都唔得，因為要行八層樓先可以拜會到Kenny兄。大約行咗七至八分鐘嘅樓梯終於到Kenny兄屋企。當Kenny兄一開門筆者就眼前一黑，各位放心筆者唔係暈低咗，只係Kenny兄嘅家居佈置全為影音而設，由四面牆身，天花板至地板都用上黑色絨布或地毯，所以全屋可以話係伸手不見五指。影音室嘅面樍大約250呎，四四方方，用嚟玩影音真係一流。
先睇睇Kenny兄嘅影音器材先:-
AV Processor：ONKYO PR-SC886
Power Amp後級：Marentz MA500 x8部
Blu-ray機：Denon 2500BCTI
投影機：SONY HW-15
投影幕：100吋 OS Pure Matt II
前置喇叭：JBL SVA-1800
中置喇叭：JBL S50 * 2
後置：JBL SVA-1800
後中置：JBL S50
Sub-woofer：Sunfire HRS-10 * 2
睇到上面嘅陣容都知Kenny兄嘅影音設備唔少嘢，Onkyo 純前級加8部Marantz mono power amp再加雙sub-woofer真係好多人希望嘅終極玩法。由一部後級去推一個channel你話終唔終極嘞，但兩隻sub-woofer明明係有源，點解要8部後級呢?因為Kenny兄行嘅係雙中置，所以8部mono後級就啱啱好嘞。不過呢個玩法都要取出代價，就係要有九個插蘇位。可惜嘅雖然Kenny兄已經喺入伙時要求業主加拉咗三條獨立電畀影音用，但Kenny兄嘅插位唔係咁夠用(當然啦，成8個後級咁狼死)，所以就用上一隻1500火嘅穩壓牛拖兩個拖板畀Pre amp, power amp 同 sub-woofer用，可能會有少少影響。
事不宜遲，Kenny兄先將隻Avatar Blu-ray放入部Denon 2500BCTI Blu-ray player度，之後等…….再等……有畫面嘞。
聲效
頭頭尾尾試咗大約四段，先講講音效先，由JBL播出嚟嘅聲真係幾有戲院feel。加上兩隻Sunfire 10吋sub-woofer出嚟個量唔錯，亦唔會大，真係啱啱好，只係好輕微有少少慢。而當晚只用上原裝嘅5.1聲效，但由兩隻JBL SVA-1800 後置做出嚟嘅包圍好好，好多時都會感到聲效由後腦嚟，真係唔錯，不過因為兩隻後置體積大同距離近，而令到空間感不足，所以筆者向Kenny建議可以試下用呃距離嘅方法去解決呢個問題。
雙中罝呢個setting有好多不同嘅見解，網上亦有好大嘅爭論。Kenny嘅雙中置係放置嘅一對前置之上微微向皇帝位toe-in。先講講筆者當晚嘅感覺到呢個setting嘅優點先，雙中置擺放嘅高度正正係幕嘅中心點，所以唔會出現一般玩投影時因中置放置幕底而出現聲音由幕下面出嘅情況。可能Kenny已將雙中置微微teo-in所以未有出現口形過中嘅問題。但凡事都有代價的(重等價交換，out咗啲喎)，雙中置嘅tradeoff係喺某啲情況下筆者感覺所聽到啲人聲好似聽緊stereo咁，而呢個情況出現喺其他聲效上就會感覺到畫面中心嘅聲音有啲虛(密度唔夠)，但情況唔太明顯。而中置同前置嘅聲亦有重叠嘅感覺，不過呢個都係話係優點。整體睇得幾舒服，無太大嘅壓迫感。對筆者嚟講已經係一個好多人夢想中嘅家庭影院嘅聲效。
畫面
唔知係唔係電嘅問題，整體上畫面比較灰同暗，有光度同力感不足嘅問題，Sony 嘅HW15雖然係入門機，但以Kenny兄全黑嘅家居環境，畫面上應有更好嘅表現。因Kenny兄事前已要求筆者為佢調校畫面，所以筆者一早帶嗮notebook同spyder 3。
先用AVS嘅校機碟做一啲基本調校，發現Kenny兄將亮度調到太低而令到失去暗位，而對比度太高亦令光位爆光。所以先將亮度同對比校好再用blue filter校好顏色嘅飽和度同色調，最後係銳利度。
基本setting做好後就開始著手校灰階，用ColorHCFR呢個免費軟件配合spyder 3 colorimter同AVS校機碟，不停咁反覆用RGB gain同offset去校80%IRE同30%IRE，最後做到接近D35水平。一直以來筆者攪唔掂Sony投影機嘅Color Management System(RCP)，每一次將六隻顏色校到同REC-709嘅色域一致，但得出嚟嘅畫面會好怪，所以筆者一般都唔會攪，今次都只係著量將個色域推大佢就算。另一個攪唔掂嘅係Gamma值，唔知點解不論用唔用Gamma correction又者或係用邊一個都好，筆者都係永遠唔夠能將Sony嘅投影機校到2.2呢個gamma值，一般都只可以做到1.6至1.8。如果有網友知道點可以將Sony嘅投影機校到2.2嘅gamma值，不妨教下筆者。
當用ColorHCFR校好灰階後，再用100%IRE睇睇個畫面嘅光度，都係只有8.XftL呢個水平，同標準嘅12-16ftL都係有嘅距離，但都比未調校前光咗。而Gamma都只可以做到1.8嘅水平。
到睇戲嘅實際畫面嘞，Kenny向筆者表示調校後影深同細節都有改善，而光度對佢嚟講亦已足夠，之後Kenny兄就拎隻Iron Man 2出嚟。
聲效上筆者都無乜可以再挑剔，應有效果都交代得好好，而畫面上紅色有點過火，所以再微調一下。
話咁快又到九點半，又係時候交人，真係好多謝Kenny兄嘅招待，畀筆者體驗到全黑嘅家庭影院，而全套JBL亦帶出濃厚嘅戲院味。
Kenny兄正考慮再多啦幾條獨立電畀影音用，筆者相信到時聲畫效果都必定有大大嘅提昇，真係期待下一次嘅家訪。
-全文完-
P.S. 以上為筆者非專嘅個人感想。
又P.S. 筆者今次連相機都無帶，只能用手機拍攝，請多多包涵相片嘅素數。
沒有留言:
發佈留言