[2011.2.25] 家訪人氣偶像fuman0123兄

家訪人氣偶像fuman0123兄 今次家訪嘅主角係討論區人氣偶像fuman0123兄，為何fuman0123兄係人氣偶像呢?原因係fuman0123兄有好幾個帖都成為討論區熱話，如單人匹馬安裝投影機，DIY音影器材架至雙線分音嘅見解點擊率都十分高，有啲帖達六千多次。而fuman0123兄亦好多時在吹水區內留言，為網友帶嚟唔少歡笑。 其實今次嘅家訪日於上年嘅10月已經開始相約，可惜Anthony嘅問題，足足爽咗三次約。好在今次由另一網友Sing1357兄幫手相約，卒之可以做到今次家訪。 為影音而生的環境 從第一步踏入fuman0123兄嘅屋企，就聞到好香嘅空氣清新劑嘅氣味，而全屋鋪上地毯。影音地方大約二百呎左右，而邊側嘅木架同茶几放滿咗CD、DVD同Blu-ray，據fuman0123兄所講剩係Blu-ray碟已達二百幾隻而DVD數目更多，真係勵害。而放置器材一方嘅後牆，fuman0123貼上好多吸音綿減少聲音不良反射，而兩側加上黑色布簾，另外部份天花油上黑色油潻，將屋企光害大大減低。而皇帝位就係一張十分舒服嘅芝華仕sofa，呢個為影音而生嘅環境真係令Anthony十分羡慕。 好，係時候睇下fuman0123兄嘅器材嘞， TV: SAMSUNG-LA 45F 81B Projector: SANYO PLZ-Z4000 Screen: GRANDVIEW Deluxe Fantasy WM-M90HD Electric Screen AV Amplifier: YAMAHA-RX V3900 Power Amplifier: Parasound HCA2003 Power Amplifier: Parasound A23 CD/SACD Player: MARANTZ-SA 8003 Blu-ray Player: PIONEER-BDP 51FD Blu-ray Player: Sony S370 DVD: Player: PIONEER-DV 420V Set Top Box: Magic TV-MTV3000 Set Top Box: SONY-DST H1000 Front Speakers: Chario reference 200T Front Presence Speakers: Monitor Audio Vector V10 Center Speaker: Chario Constellation Phoenix Surround and Surround Back Speakers: Monitor Audio-BRFX Subwoofers: Mordaunt-Short Aviano 9 * 2 染上打孖症的fuman0123兄 嘩!水蛇春咁長嘅gear list真係打都打到手軟。而Anthony十分懷疑fuman0123兄係有強迫症，有鋪起孖癮。大家可以睇到fuman0123兄好多器材都係打孖上，兩部Power Amp同雙sub-woofer都可以理解，連機頂盒同Blu-ray player都起孖真係令Anthony摸不著頭。fuman0123兄解釋到因為有時佢朋友會燒一啲Blu-ray碟畀佢，不過有啲碟喺Pioneer BDP 51F D不能播放，所以先另購一部Sony S370作後備之用。 除咗打孖癮外，fuman0123兄重好鍾意嗮(Sine)嘢，大家睇睇下面啲電源處理就知。 SINE-SAF -60A 平衡式電源處理器 SINE-VM-1 電壓顯示表 SINE-Cassio 電源線(兩條) SINE-Louis 電源線(一條) SINE-Cassio 喇叭線(一對) SINE-SW-2 美式雙位冷凍插座(音響級)一個 SINE-Cryo 美式15A 冷凍插頭(一個) SINE-MATRIX Cube 化震朱古力(三粒) 不過唔好以為fuman0123兄喺二百零呎空間放咁多碟同器材，間屋一定亂過亂世佳人。剛剛相反，fuman0123兄將屋企可謂打理得井井有條，一塵不染，十分乾淨同舒服。一啲都唔似單身獨居男士(唔好誤會fuman0113兄有女友，唔係宅男)。 CD表現 fuman0123兄建議先聽下音樂先，而Anthony亦襯呢個時間影下相。音樂一起，幾下結他聲之後，就聽到“為你鍾情，傾我至誠 請你珍藏 這分情…..” 把聲咁似李冶延，經fuman0123兄介紹，原來係嚟自大馬嘅組合2V 1G 。由MARANTZ-SA 8003經YAMAHA-RX V3900加Parasound HCA2003推Chario reference 200T播出嚟嘅聲音十分動聽，加上係Anthony鍾意嘅小品音樂，結他清脆而人聲都聽得十分舒服。 之後fuman0123兄就換上“天下第一鼓”畀我地聽，由Parasound HCA2003 200W/ch推出嚟嘅鼓聲真係不得了，十分結實有力，聲音離箱，而由Chario reference 200T前置喇叭打出嚟嘅低頻，真係連地下都震埋，真係不得了。其實Anthony之前都喺鋪頭聽過Chario呢個意大利牌子嘅喇叭，感覺音樂味濃厚。嘅而fuman0123兄道對Chario reference 200T之前只係用四千多元購入，而呢個價位可以買到意大利制造加上有咁嘅表現，真係十分超值。fuman0123兄繼續道之前未加上Parasound HCA2003時低頻表現未有咁理想，會有少少肥嘅感覺，但加上Parasound HCA2003後，可能dumper factor達800之高，令到Chario reference 200T收放得好好，而低音亦變得結實好多。 電影表現 當試咗幾隻CD後，fuman0123兄就動身開投影機，第一套機試嘅係比較冷門嘅I am Legend，其實Anthony都好多時都有喺屋企用呢套戲試聲。 I am Legend Chapter 2一開頭主角喺癈城NY city中飛車可以試到Yamaha嘅強項…環繞聲。烏鴉喺車頂飛過一幕由頭至後嘅感覺自然。之後獅子撲出一幕嘅迅變十分好，另Anthony都嚇咗一嚇。 而尾段大批喪屍攻入屋一段好多特如其來嘅音效，槍聲同爆炸聲都衝擊力十足。 Taken 之後Anthony要求試下Taken嘅尾兩段，主角被屌高嚴刑烤打一段，人聲清色有力，好有質感而環境聲亦處理到好好，槍聲亦下下震sofa。之後黑夜飛車一幕，背景音樂吸引，但亦無遮蓋音效，如汽車嘅引擎聲亦可以清楚聽到。 War of the World 頭段閃電嗰幾下迅變處理得好好，而之後外星人由地底出嚟，亦做到地震效果，十分震撼。 Book of Eli 街頭槍戰一幕，聲音定位子彈軌跡都好好， 而用機槍掃射木屋一段分晰力亦出眾。Sing1357兄表示覺得fuman0123兄放置後置嘅高度係最適中。 Crash of Titans 中段打大蝎子氣氛緊湊，而打蛇女美杜莎時環繞聲效做得好好，有如設身現場。 以前Anthony聽過好幾次Yamaha嘅AV AMP總覺得環繞音效係好，但聲音好散欠質感，但今次同以往所聽嘅唔同，唔止質感好，重係有氣有力，吓吓掃腳震sofa。fuman0123兄解釋佢無用到Yamaha嘅presence speaker(大家所見到嘅原來只係裝飾用)，主要原因投影幕遮住咗對presence speaker，加上fuman0123兄反覆試過好多次，發現自己較喜愛直出直入音效嘅質感，而配上200W一聲道嘅Parasound HCA2003後級，就做出呢個有別於傳統Yamaha嘅音效。 但最叫Anthony驚喜嘅都莫過於係Mordaunt-Short Aviano 9 sub-woofer，呢隻sub-woofer收放十分快，量唔太大但好有質，而用上兩隻後，地震爆炸等大場面亦應付自如，震撼力十足。呢隻三千零蚊嘅sub-woofer真係令Anthony大跌眼鏡。 畫面方面都無乜大問題，只係Anthony覺得如果喺黑暗畫面時亮度高一點就好。 總括嚟講fuman0123兄嘅家庭影音係十分高質數，平衡上面偏少少刺激感，高音唔刺耳但清楚，人聲到幕中心點，質感好好，而低頻有力，收放快。整體氣氛會令人睇得十分投入。 而Sing1357兄嘅見解係因為fuman0123兄全屋吸音做得好好，後牆吸音綿加大地毯，所以殘響少，聲音來得乾淨，自然結實有力。 最後好多謝fuman0123兄嘅招待，三個大男人有傾有講有機玩過咗一個愉快嘅夜上。 -全文完-