影音巿場上可以劃分為Home Theatre Audio同 Professional/Studio Audio，Home Theatre Audio講求包裝，設計，音色，而Professional/Studio Audio講求效律，準繩同實用。兩者出色品牌多不勝數，講足一星期都介紹唔嗮。但如果要數Professional/Studio Audio中廣為人熟識嘅品牌來自美國嘅M&K Sound，可惜呢個品牌嘅產品隨著公司清盤嘅已經成響响(當中歷史中嘅是非黑白唔係今次家訪嘅重點，故此不多作著墨，有興趣者可於網絡上自行搜查)。但仍然有好多支持者喺巿場上搜羅貨尾或二手貨品，有一段時間更有抄賣嘅情況出現。而今次家訪嘅主角就係百份之百嘅M&K Sound fans 10bucks360兄。
早於年多兩年前喺網上討論區認識10bucks360兄，得知佢係M&K fans，家中有多隻絶版嘅M&K Sound 150 series嘅喇叭，加上兩隻M&K嘅sub-woofer。而於上年尾，知道10bucks360兄購入7隻全新絶版M&K MPS1611P嘅主動式喇叭取替150 series，亦因為每隻喇叭本身已有兩個後級推動，所以10bucks360兄就唔再需要早前用嚟推150 series嘅兩部Parasound Halo A52同A23後級，而順理成章連帶用作解碼嘅Yamaha Z7合併擴音機亦被Cary Audio Design嘅Cinema 11a 取替。後來10bucks360兄再喺巿場上購入多一隻M&K MPS1611P作後備之用，最後得出依家十分主動(8隻主動式喇叭加2隻主動式超低音)有前無後(只有前級解碼並無後級擴音)的M&K系統。
除咗上面所講嘅大轉變外，10bucks360兄重購入Sony HW15投影機，正式踏入大畫面之路。而今次家訪嘅任務就係為10bucks360兄調校Sony HW15嘅畫面。踏入10bucks360兄嘅屋企見到同Anthony嘅家居攞法差唔多，都係前面用作影音，後面擺放飯枱。有點唔同嘅係10bucks360兄係長方形，唔會好似Anthony咁右邊有個位走咗啲聲，音場更平衡。
一般影音發燒友嘅家居都會放滿一件件嘅器材，但10bucks360兄嘅影音就十分簡絜，器材如下:
AV Processor: Cary Cinema 11a
Speakers: M&K MPS1611P*7 +1
Sub-woofer: M&K MX-5000*2
Room EQ Corrector: AS-EQ1 Subwoofer EQ
Blu-ray Player: OPPO BDP-83
Projector: Sony HW15
Screen: OS Pure Matt 2 Plus 80”
大家可能會留意到10buck360兄嘅器材上都有一張黑色嘅咭紙，原來10bucks360兄除咗係影音發燒友外，重係愛貓之人，為妨家中兩隻愛貓弄花器材，所以就喺器材上加上黑色咭紙作保護，既安全又美觀。
本身10bucks360兄從事同色彩有關嘅工作，加上工作上認識唔少真正嘅工程師，技術顧問，影音雜誌總編等，對色彩有一定嘅認識。而10bucks360兄更從公司借嚟比Anthony 所用嘅Spyder TV更高階嘅Eyeone Pro colorimeter作調校之用。所以今次Anthony校機都有啲壓力，不過既然都嚟到加上可以試一下Eyeone Pro呢隻高階colorimeter，Anthony就抱住胆粗粗摶出醜嘅心態去為10bucks360兄校部HW15。
第一次操作Eyeone Pro感覺係一個字…快，不論高光還是低光下都可以立即地反應數據到PC上。而10buck360兄部HW15表現亦十分線性，只要用30%同80% IRE去調校灰階後，由Eyeone Pro度出由20%至100%IRE都十分貼近D65嘅水平，表現線性得很。一直嚟Anthony用咗好多方法，不論用Gamma Correction，用Pattern配合brightness同contrast定係用colorimeter配會公式，都係唔能夠將Gamma值調到2.2呢個水平。頂到盡去到1.8。今次亦唔例外，用咗個多兩個鐘時間都只可以做到1.8呢個水平，不過表現十分平滑同線性，後嚟再調低少少brightness令黑位實淨少少，幸好校完後10bucks360兄亦收貨。(如果有前輩有方法可以將Sony嘅投影機校至Gamma 2.2呢個水平不妨分享一下，Anthony十分願意請食餐便飯當交學費)
Sony投影機另一難攪之處就係RCP，Sony嘅RCP調校類近傳統嘅color management，都係有六隻色嘅飽和同色相，但無流明度，取而代之嘅係位置同範圍，試過好多次唔開Sony嘅x.v. color同wide color space，就算用colorimeter將六隻色校至HD709-REC嘅色域，但實際出嚟嘅畫面都係平淡同古怪。所以一般Anthony作家訪校Sony投影機都唔會陏個RCP。但難得今次有隻高階colorimeter玩，就即刻試試，最多校唔掂就off咗佢。喺Eyepne Pro嘅幫助下好快就可以將藍綠黃青校至用HD709-REC色域，但紅色就用盡方法都唔陏，而洋紅色亦因為紅色而有少許偏差。喺開嗮wide color space同x.v.color下用肉眼睇藍綠黃青四色無太大嘅偏差，只係因為無得推高各色嘅流明度而令黃同青有十分輕微的暗。睇pattern個分別永遠大過實際畫面好多，所以都係試下Blu-ray為準。
先試一吓Ku Fu Panda嘅色彩，有少少灰，調低少少brightness後有所改善，而色彩有少少淡，加少少飽和已同平時睇開嘅差無幾。
(相片因爆光不足所以十分暗，而雜訊係相機高ISO所致，同實際畫面有大偏差)
到逃獄一段10bucks360兄表示紅色靚咗好多，至黑位亦實淨咗。咪住先，卡通片色彩靚，畫面無雜訊自然好。睇吓現實嘅戲先下定論。
Anthony提議不如試下Taken，由主角被捉一段開始，出事嘞。睇到除咗皮膚顏色有少少偏紅色外，個個人都好似油上唇膏咁，要再喺RCP度微調一下。最後得出自然唔誇張嘅紅色。
聲音方面，Anthony被邀座喺皇帝位，10bucks360兄表示如果Anthony見到前中置三粒燈就証明Anthony坐正皇帝位唔駛估估下，真係十分專業嘅setting，樣樣有物可依。 Cary 11a 配上7隻主動式喇叭速度快而準，而當晚只係用上一隻sub-woofer，但低頻包圍感做得好好，雖然量唔算好大，但掃褲腳吹頭髮亦做得到，加上無blooming問題，聽得亦舒服。只要解決埋因假天花嘅輕微諧震，咁就perfect。
環繞聲方面10bucks360兄表示因為高度問題引至後置toe down不足，的確M&K呢類monitor喇叭指向性極強，表現就會受高音單元是否指向耳仔而有所影響。Anthony亦相信如果10bucks360兄後置可以toe down多少少，環繞聲表現會更上一層樓，但現時亦無太大問題。
同10bucks360兄閒談間得知佢對M&K嘅所有產品型號、特性至真偽驗証都十分有心得，除咗收藏自己喜愛嘅品牌外重對其歷史產品特性都咁清楚真係明符其實嘅M&K專家，值得Anthony好好學習。
今次花咗唔少時間喺畫面調校上，相對相片比少，請多多見諒。
-全文完-
沒有留言:
發佈留言