對於Anthony嚟講一套影音系統中最難玩得好莫過於係sub-woofer，佢可以話係氣氛形造嘅功臣。雖然話家庭影院好睇自己口味，不過都唔可以太偏離。如果將sub-woofer 嘅聲量set得太細可能會無氣氛同唔夠剌激，相反set得太大會出現blooming同諧震等問題。Anthony都花咗唔少時間調校隻SVS PC12 Plus，但都未能完全滿意現時嘅低頻表現。sub-woofer玩一隻都咁難，可況係玩兩隻甚至係三隻四隻嘅sub-woofer時，調校所需要嘅時間、精神同功力都要以倍數咁增加。現時好多日本品牌都推出7.2，9.2甚至11.2嘅AV AMP，令更多發燒友加入玩雙十嘅系列，雖然今次家訪嘅主角唔係用上7.2/9.2嘅AV AMP，不過佢都受前輩嘅影響用上兩隻sub-woofer，佢就係是嗎兄。
Anthony喺網論區中收到是嗎的短訊，表示希望邀請Anthony幫手調教新入手嘅Sony HW20投影機外，亦對現時聲音上嘅setting唔係咁滿意，希望Anthony可以畀下意見。有家訪Anthony當然來者不拒啦。
嗎兄嘅影音環境大約百多呎，大約10呎距離睇90吋畫面，聲音方面用上5.2系統，先睇睇是嗎兄嘅gear list:-
AV Processor:ONKYO876
PRE AMP:PARASOUND A 52
Speakers:USHER S 520 & S525
Sub-woofer: VELODYEN DD 10 & M&K KX-12
Blu-ray Player: OPPO BDP-93
Projector: Sony HW20
Screen: OS Pure Matt 2 Plus 90”
先嚟嘅係為是嗎兄調校部Sony HW20投影機，今次係Anthony第二次接觸HW20，重要係一星期內校兩次HW20。先將HW20嘅模式由"用戶1"改為"影院"，而Gamma用上"用戶3"，而色温繼續用上"用戶3" ，之後先用AVS HD709校機碟調校一下基本setting，其實HW20出廠嘅設定已經十分接近標準，只要微調一下已經好快咁完成基本調校。之後再用ColorHCFR配合SpyderTV3量度一下灰階同色域，從SpyderTV3量度出嚟嘅樓據顯示現時嘅灰階已經十分接近D65呢個水平，只係紅色用藍色嘅色温有輕微不足。是嗎兄表示原來呢部HW20早前因為被討論區借用作投影機比試，而因此網友Chris兄亦曾為呢部機調校過，只不過上一次係針對投影機比試場地光師父影音室嘅環境作調校，唔怪得個setting咁接近啦。Anthony向是嗎表示現時量度出嚟嘅數據差異有兩個可能性，第一係因調校環境嘅不同所引致，第二係因兩隻唔同嘅量度儀器出現嘅偏差。
當進入色温作微調見到紅色同藍色調校至-1X呢個水平，最後只要微微調高就可以達到D65呢個水平，而Gamma值就十分線性地維持喺2.2呢個水平，數值十分理想。最後得出以下數據:-
調校好畫面後，先用Ku Fu Panda試試聲畫。是嗎兄表示畫面上比之前睇到更多細節，而黑位亦唔會出現太過灰浮嘅情況。其實HW20本身出廠時畫面已經十分理想，加上呢部機早前已經有另一網友幫手調校過，Anthony今次只係針對是嗎兄嘅家居環境作微調，工作十分簡單。
聲方面，是嗎兄表示總覺得現時嘅setting前中置比後置搶耳，睇演唱會時更甚。而低頻方面是嗎兄用上M&K KX12加上Velodyne DD10，本來係希望有M&K嘅衝擊力嘅同時亦有墊底嘅氣氛。可惜set極都未達理想。
試咗Ku Fu Panda兩段，Anthony只覺中高音效特出，但未去到搶耳程度。而低頻量的確唔似用上兩隻sub-woofer，甚至比一隻8吋還少，亦感覺唔到M&K KX12嘅特性。當中有啲低頻好似消失左。是嗎兄表示因為聽前輩講只要sub-woofer set得好，係可以用一個setting去睇戲同聽演唱會而唔需要轉setting。(
Anthony都係用一個setting睇戲同演唱會，不過唔係Anthony set得好，只Anthony懶去轉setting(笑)。)因為之前睇某套戲時覺得低頻太多好blooming，所以將DD10嘅聲量由3X大幅調低至1X。Anthony提議試下先調高返DD10兄聲量再試一次。第二次試吊橋打鬥一幕，墊底嘅低頻有返，老虎女嘅心跳聲亦清楚聽得見，不過拳腳聲效還未有M&K嘅狠。都係試埋其他碟先。
Mr. & Mrs. Smith屋內槍戰一幕，人聲同其他聲效特出，而中高比較多，多得Paraound Halo A53嘅幫助前中置力水充足，音效迅變理想。
之後一段，男配角被電話叫醒時屋外嘅貨車同火車聲都清楚，分晰力同Surround Sound都做得唔錯。之後車中男女對話亦清晰。
最後就試下容袓兒最新嘅Number 6演唱會，睇下是嗎兄講嘅問題。選上"痛愛"一曲，今次真係感覺到是嗎兄所講前中置搶耳嘅問題，中高的確有少少響亮，有少少簿。反而後置一般都係一啲拍掌同觀眾叫聲，唔特出係正常。
經了解是嗎兄嘅setting後，Anthony相信前中置槍耳係因為喇叭箱體問題，是嗎兄嘅前置係小型書架喇叭，而低音單圓只有三吋半至四吋左右，喺物理上低頻量會比較少，而中置箱體比前更大，睇戲時七成聲效由中置輸出，所以問題唔會太特出。但當睇演唱會時人聲由前中置一齊輸出而音樂亦依重前置時會現中高特出，低頻稍欠嘅情況。
Anthony建議是嗎兄可嘗試先將前置crossover調高，分多一啲工作畀sub-woofer，而因為是嗎兄嘅喇叭線已經用上Audioquest嘅中高階型號，喺唔需要駛太多錢嘅前提下，Anthony提議可以換走原裝銅片jumper，亦可以試下喇叭線先入高/低音正/負極先後不同嘅組合試下，因為有時畀電唔夠都會出現打得出收唔返令音效搶耳嘅情況。
而低頻方面，因為是嗎兄一直對的士雄嘅setting十分難忘，希望可以有類近嘅效果。以Anthony記憶所及的士雄嘅setting中低十分出眾，剌激有力。Anthony建議可以由現時先由AV AMP到Velodnye DD10再用T字頭出M&K KX12改由AV AMP直接用一出二頭同時到兩隻sub-woofer，甚至依重KX12多啲，DD10只係作助。希望可以惜助M&K嘅狠快去制造出類近嘅效果。
理論還理論，Anthony自己都未有玩兩隻sub-woofer嘅經驗，Anthony以上嘅提議都只係推斷出嚟，未必一定可以幫助到是嗎兄。如果任何朋友有唔同嘅建議不妨提供畀是嗎兄參考一下。
最後多謝是嗎兄嘅邀請畀Anthony有一個試下雙sub-woofer嘅威力，另外亦要對"伯有"因為Anthony今次嘅家訪而有家歸不得講聲唔好意思。喺度祝是嗎兄早日調校出自滿意嘅音效。
-全文完-
PS:以上為Anthony非專業嘅個人感受，如果得罪請多多包涵。
沒有留言:
發佈留言